திருப்புகழ் (முத்தைத்தரு) - பாட்டும் பொருளும்

இணையத்தின் ஏதோ ஒரு பக்கத்தில் எனக்கு கிட்டிய இசைத்தமிழ் உங்கள் பார்வைக்கு..!

 

முத்தைத்தரு பத்தித் திருநகை
அத்திக்கிறை சத்திச் சரவண
முத்திக்கொரு வித்துக் குருபர ..... எனவோதும்

   முத்தினைப் போன்றொதொரு வெண்ணிறத்தின் எழிலுக்கு

ஒத்ததாய் அமைந்தவொரு ஒளிமிகு இளஞ் சிரிப்புடனே

தேவர்க்குத் தலைவனாம் இந்திரன் பெற்றிட்ட

தேவயானை எனும் கரிமகளின் நாயகனே!  

அன்னையாம் உமையவள் அன்புடன் ஈன்றிட்ட

சக்திவேல் எனும் ஆயுதத்தை கையினில் ஏந்துகின்ற

சரவணபவ என்கின்ற அறுமுகக் கடவுளே!

முக்தியெனும் வீடுநிலை பெற வித்தாக இருப்பவரே!

தந்தைக்கே ஒரு மந்திரத்தின் பொருள் சொல்லி

தகப்பன் சுவாமி எனப் பெயர் பெற்ற

குருவான சிவனுக்கும் குருவான பெருங்கடவுளே!

முக்கட்பர மற்குச் சுருதியின்
முற்பட்டது கற்பித் திருவரும்
முப்பத்துமு வர்க்கத் தமரரும் ..... அடிபேணப்

        என்றெல்லாம் உனைத்துதிக்கும் முக்கண்ணன் பரமசிவனுக்கு

முன்மைக்கெல்லாம் மூத்ததான முழுமுதற் பொருளான

சுருதியெனும் வேதத்தின் முற்றுப் பொருளான

"ஓம்" என்னும் தனிமந்திரத்தை மடி மீதமர்ந்து உபதேசித்து

அடிமுடி அறியவெண்ணி அங்குமிங்கும் அலைந்த

பிரமன் திருமால் இருவரும் கூட

முப்பத்து முக்கோடி தேவரும் சேர்ந்து

நின்னடி பணிந்து வாழ்த்தி நின்றிடவும்,

பத்துத்தலை தத்தக் கணைதொடு
ஒற்றைக்கிரி மத்தைப் பொருதொரு
பட்டப்பகல் வட்டத் திகிரியில் ..... இரவாகப்

        திக்குக்கொரு தலையெனப் பத்துத்தலை படைத்திட்ட

தென்னிலங்கைத் தேவனாம் இராவணனின் தலைகள் சிதறி வீழ

அன்றங்கு ஓர் அம்பை விட்டு அவுணரை அழித்த,

ஒப்புவமை இலாத மந்திரமெனும் மலையினை

மத்தாகவே கொண்டு பாற்கடலைக் கடைந்திட்ட,

அன்றொருநாள் அண்ணன் தம்பிகளுக்கிடையே

மூண்டதோர் பாரதப் போரின் பதின்மூன்றாம் நாளினிலே

அதமத்தின் வழி நின்று அபிமன்யுவைக் கொன்ற

ஜயத்திரதன் எனும் அரசர் கோமானை,

"மறுநாள் மாலை சூரியன் மறைவதற்குள்

என்மகனின் மறைவுக்குக் காரணமான

ஜயத்திரதனைக் கொல்லானேயாகில்,

அக்கினியில் புகுந்து அன்றே உயிர் துறப்பேன்" என

சூளுரைத்த பத்தனைக் காக்கவென

'போரிலே ஈடுபடேன்' எனும் வாக்கினையும் மறந்து

தன் கையில் தாங்கியுள்ள சக்கரத்தை விட்டெறிந்து

சூரியனைச் சிலகாலம் சயனிக்கச் செய்ததாலே

வெளிவந்த சிந்துராசனாம் ஜயத்திரதனை

விரைவாகக் கொல்லச் செய்தருளி உதவிட்ட,

பத்தற்கிர தத்தைக் கடவிய
பச்சைப்பு யல்மெச்சத் தகுபொருள்
பட்சத்தொடு ரட்சித் தருள்வதும் ..... ஒருநாளே

      இத்துணை வல்லமை இயல்புடனே படைத்திருந்தும்

அத்தனையும் காட்டாமல் அடக்கமாக நண்பனுக்குத்

தேரோட்ட இசைந்து தேர்ப்பாகனாய் வந்திட்ட

மரகதம் என்கின்ற பச்சைமணியின் நிறத்தினை ஒத்திட்ட

அன்பருக்கு அருளிடவே புயல் போல வந்தருளும்

மரகத வண்ணன், பச்சைமாமணி வண்ணனும்

மெச்சுகின்ற பரம் பொருளே! என்னை நீ

பரிவுடனே ரட்சித்து அருள் புரியும் ஒருநாளும்

உண்டோ என நான் இறைஞ்சுகின்றேனே!

தித்தித்தெய ஒத்தப் பரிபுர
நிர்த்தப்பதம் வைத்துப் பயிரவி
திக்கொட்கந டிக்கக் கழுகொடு ..... கழுதாடத்

      தித்தித்தெய என்கின்ற தாளத்துக்கு இசைவாக

முத்துகள் அமைந்த சிலம்பினை அணிந்த

நர்த்தனம் செய்கின்ற பதங்களை வைத்து

பார்த்தவர் நடுங்கும் பத்திரகாளியும்

எத்திக்கும் சுழன்று தாண்டவம் செய்யவும்,

பிணங்களைக் கொத்தவெனக் காத்திருக்கும் கழுகுகளுடன்

பிணந்தின்னும் பேய்களும் சேர்ந்தங்கு கூத்தாடவும்,

திக்குப்பரி அட்டப் பயிரவர்
தொக்குத்தொகு தொக்குத் தொகுதொகு
சித்ரப்பவு ரிக்குத் த்ரிகடக ..... எனவோதக்

      எட்டுத் திக்கிலிருந்தும் இவ்வுலகைக் காத்திடும்

அட்டப் பயிரவர் என்கின்ற எண்மரும்

ஆட்டத்தில் அழகிய இக்கூத்தினுக்கு ஏற்ப

தொக்குத்தொகு தொக்குத் தொகுதொகு த்ரிகடக

என்னுமோர் தாள ஓசையினைக் கூறிடவும்,

 

கொத்துப்பறை கொட்டக் களமிசை
குக்குக்குகு குக்குக் குகுகுகு
குத்திப்புதை புக்குப் பிடியென ..... முதுகூகை

        கூடவே தாரை, தமுக்கு, தப்பட்டம் என்கின்ற

பற்பல பறைவாத்தியங்களையும் முன்சொன்ன

தொக்குத்தொகு தொக்குத் தொகுதொகு த்ரிகடக

என்கின்ற அதே தாளத்தில் அழகுற முழங்கிடவும்,

பலகாலம் வாழ்ந்திருந்து, பல போர்களைப் பார்த்திட்ட

கிழமான முதிர்ந்த கோட்டான்களும் மகிழ்ந்து

குக்குக்குகு குக்குக் குகுகுகு, "குத்திப் புதை", "புக்குப் பிடி" என

கூக்குரலிட்டுக் குழறி, வட்டமெனச் சுழன்று

இட்டமுடன் மேலே எழுந்திடவும்,

கொட்புற்றெழ நட்புற் றவுணரை
வெட்டிப்பலி யிட்டுக் குலகிரி
குத்துப்பட வொத்துப் பொரவல ..... பெருமாளே.

      தனக்கு வரமளித்த சிவனாரின் மகனென்னும்
இணக்கத்தை மறந்து பகைகொண்ட அசுரர்களை
வெட்டிக்கொன்றங்கு குவித்துப் பலிகொண்டு,
அவுணர் குலத்துக்கு இசைவாய் நின்றிட்ட
கிரௌஞ்சமெனும் மாமலையும் வேலாலே குத்துண்டு
பொடிப்பொடியாய் உடைந்துபட அறவழியில் நின்றன்று
அசுரருடன் போர் செய்த பெருமையிற் சிறந்தவரே!